以前覺得自己同班85后同事溝通唔嚟，
驚死自己被人叫“老屎忽”，所以無乜出聲；
而家經常都要對著個d“食鹽多過我食米”嘅長輩，
更加唔使溝通，因為分分鐘被人講成系自以為是、目無尊長。
唉……嫩嘅搞唔掂，老嘅又唔夠佢玩，
你話，做人做到我咁，系唔系好鬼無用？！
遇著d細嘅，佢地做錯重可以話佢兩句；
呢班長輩個個好似米飯班主咁，
明明自己做錯重要聲大夾惡，惡人先告狀，
搞到我呢個唔識世界嘅細路哥同佢地講話都似同皇上講話咁小心翼翼，
驚死隨時人頭落地。
明知對方賴貓都要揸頸就命同佢地講：
“唔知系唔系郵箱滿咗或是我寫錯做個email俾你，所以無收到你d嘢，
或者我再俾過我嘅email你咯，好唔好？真系唔好意思啊。”
“唔知系唔系我記錯日期，俾錯時間你，其實應該系今日啊。
啊哈哈哈哈，真系烏龍啊！
唔好意思啊，麻煩你等陣有時間就email d嘢俾我，真系麻煩嗮你啊。”
“唔知系唔系我之前做錯咗d乜嘢，所以而家要慢慢受你地呢班人嘅訓練啊？
麻煩你地俾條生路我行啊，唔該嗮。”
喂，大家出嚟做嘢，你地為人師表又自認專業嘅話，麻煩做嘢做靚嚟！
毋要人三催四請重要面不改容地大話連篇、借口不斷!
無論你幾德高望重，都無可能系完美零錯誤、零缺點o架？
小事你都唔認錯，黑都講成白，又點會贏得別人嘅尊重啊？
你食鹽多過我食米，你出嚟做嘢個陣我都未出世，
咁簡單嘅道理，你應該比我更清楚啊？
又或者，你地已經超凡脫俗，人世間嘅貪嗔癡已經與你無關，
所以可以做到相信自己所要相信嘅，其余嘅一概系牛屎？
真系討厭自己為五斗米而折腰，為啖無謂嘅骨氣而搞到自己越嚟越無骨氣！
同d前輩溝通到我心力交瘁，僅有嘅尊嚴同原則都慢慢磨蝕，
我越嚟越渺小啦……
做工認真都會無端百事踩中地雷、被人射冷箭，
天理何在啊？
又或者，系我未搞清楚游戲規則？
 |
| 圖片來源：http://czone.chinavisual.com/art/4c43b2e3497959816e450000.html |
怨氣沖天（待超渡中）